مامان کندی
فلک چرخین زنجیرلرین یاغلادی
یواش یواش یوللاریمی باغلادی
داغلاریمی دوباره دن داغلادی
داغلاریمدا دستمال چکدی آغلادی
او قدمتلی دام دوواریم سوکولدی
وای قوجالدیم غمنن بئلیم بوکولدی
یازبولودیم بوشالمامیش دولاردی
سارماشقلار اوزون کولا دولاردی
اوشاقلاریم تزه تره یولاردی
بایرام آیی چوخ قوناقیم اولاردی
حیف اولسون داغیلیبدی قوناقیم
یامان کوسیب کهریزلریم بولاقیم
دولی بولود؛ سن آللاهون بئله گل
گوز یاشیوی یاغدیر گیله گیله گل
ساری یازیم،دوغدار زمیم؛دیله گل
دینن: گیجل؛ دونسن سرین یئله گل
صفا وئرسین یاغیش سرین یئلینن
دردلشیم من غملی گئدن ائلینن
مرد ایگیتلر تورپاقیمدا یاتیپدی
بیر عده لر کوچلرینی چاتیپدی
بو غصه لر احوالیمی قاتیپدی
ترسه چیخان گونوم ترسه باتیپدی
آران کندم منیم آدیم ماماندی
داغیلمشام احوالیم چوخ یاماندی
مینلر کروان تورپاقیمنان گئچیپدی
بولاقیمین سرین سویوی ایچیپدی
پنبه لری ال چلتیگیمی بیچیبدی
ایندی باخون چراغلاریم گئچیبدی
هارادا قالدی بیچین بیچن اوراقلار
دریا موجی مامان کندین سراغلار
داغلاریما قیشدا یاغسین قار منیم
آقاجلاریم یازدا اولسین بار منیم
شیرین کیمی فرهادلاریم وار منیم
مین شاه گله، سسله نللر: یار منیم
عومور گئچدی قورقو بئله قورولدی
شهریارین سّدی منه وورولدی
(چهارشنبه سی مرداد 92)
[ سه شنبه 93/1/12 ] [ 7:26 عصر ] [ فهیمه اختیاری ممان ]
